Նորություններ


Միջին խավը Հայաստանում

Վերջին յոթ տարիների ընթացքում Հայաստանում սկսել է իջնել միջին խավի ներկայացուցիչների կենսամակարդակը: Այդ մասին են վկայում “Նորվիկ” Ունիվերսալ վարկային կազմակերպության վերլուծական բաժնի հետազոտությունները, որոնք տրամադրվել էին Արմինֆո-ին:

Նրանք նշում են, որ այդ երևույթները կարող են անհետադարձ փոփոխություններ առաջ բերել, ընդհուպ մինչև որակյալ կադրերի միգրացիա դեպի արևմտյան երկրներ և որպես դրա արդյունք`տնտեսական ցուցանիշների էական նվազեցում: Իրականում, հենց միջին խավն է հանդիսանում քաղաքացիական հասարակության ակտիվ մասը, որը ամենազգայունն է փոփոխվող տնտեսական իրողությունների նկատմամբ: Դրա հետ մեկտեղ, համաշխարհային ֆինանսական ճգնաժամը աստիճանաբար ներխուժում է ոչ միայն բանկային ոլորտ, այլ նաև արտադրության, բնական ռեսուրսների, առևտրի և տնտեսության այլ ոլորտներ, որից հետո`միջին խավի թվի և նրանց եկամուտների աճի վերաբերյալ պաշտոնական կանխատեսումները նվազ հավանական են դառնում:

Տնտեսագետները գտնում են, որ մոտ ապագայում մեր երկրում սպասվում է միջին խավի կտրուկ կրճատում, աղքատության ավելացում և բնակչության եկամուտների ընդհանուր անկում: Եթե այժմյան ճգնաժամը կարելի է համեմատել 1929 թվականի բանկային ճգնաժամի հետ, ապա այդ ամենի հաղթահարման համար կպահանջվի առնվազն հինգ տարի՚, նշում են մասնագետները: